بعد دعوة النائب إيهاب مطر بالأمس، شهدت منطقة التبانة أمام مسجد القاضي عمر، إحتفالا اليوم بعد صلاة الجمعة، حضره حشد جماهيري وأعضاء وشباب وشابات من مجموعة IMD، وذلك لمناسبة سقوط النظام السوري. وأطلق فيه مطر مواقف وطنية تؤكد “التمسك بالدولة والاعتدال”، مشددا على أن “الأسد سقط وبقيت طرابلس الدولة والاعتدال”.
وجاء في كلمة مطر: “اهلا بطرابلس اللبنانية، طرابلس العربية، طرابلس الاعتدال، طرابلس الانفتاح والعيش الواحد من كل طرابلس أتينا لنقول سقط النظام… سقط بشار حافظ الأسد وبقيت طرابلس الحلوة بأهلها وناسها وسكانها.. وهيك كانت وهيك حتبقى.
وقال بالعامية :” من أول ما دعيت لهل التجمع وبلشت الاتصالات تنهال علينا لان الناس برا وجوا بعدهم متأثرين بصورة سلبية عن طرابلس… ربطوها بالتطرف والطائفية والفلتان… بس حضوركم انتم اليوم رد على كل الخائفين من قول الحق. وحضوركم وصل رسالة: انو نحنا أبناء الدولة ونحنا حماة الاعتدال بالبلد وحراس الوحدة الوطنية. والي بدو وطنية يجي عطرابلس. خبروهم انو طرابلس ما عندها حقد، خبروهم انو طرابلس فتحت أبوابها للجميع، خبروهم انو انتوا متمسكين بكل مكون بطرابلس… كلنا يعني كلنا، سني ومسيحي وعلوي.
لهيك كل الشعارات الي بدها تطعن بأي طرابلسي مهما كانت طائفته أو سياسة حنرد عليها ونقولهم طرابلس واحدة. اليوم أتينا نحتفل سوا، بسقوط نظام مارس أبشع أشكال الوصاية على لبنان كل لبنان، وكان لطرابلس حصة الأسد، قتل وارهاب وتفجيرات واغتيالات..
نعم سقط الذي اغتال الرئيس الشهيد رفيق الحريري…. سقط الذي نفذ تفجيري التقوى والسلام .. سقط الذي ارتكب مجزرة التبانة، سقط الذي اعتقل شبابنا وعذبهم.. سقط الذي كان يلاحق الطرابلسيين بوثائق وتقارير مزيفة… سقط الأسد وبقيت طرابلس اليوم بدنا نكون ثابتين على موقفنا:
أولا: طرابلس مدينة لبنانية عربية بتحتضن كل اللبنانيين وبتحمي كل سكانها… خلوا المسلم والمسيحي والعلوي وكلهم يسمعوا.
ثانيا: طرابلس مدينة العلم والعلماء جزء من لبنان الدولة، ومنها قندهار ولا جزيرة… يجوا يتعلموا عنا كيف العيش الواحد.. يجوا عشوارعنا واحيائنا… يجوا يشوفوا المحبة والانفتاح.
ثالثا: سقط النظام بسوريا نعم، لكن نحنا كلبنانيين ما منتدخل بالشأن السوري ولا بدنا حدا يتدخل فينا. نحنا منحترم الي بقرروا الشعب السوري وكل الشعب السوري، وبدنا علاقات قوية واخوة وجيرة وعلاقات بتحكمها الدبلوماسية والغطاء العربي.
وبهل الاطار سمعنا كلام أنو مسؤولين سوريين اجوا على لبنان ليحتموا بين اللبنانيين، وبهل الموضوع الدقيق والحساس منتمنى من الدولة وخصوصا الاجهزة ملاحقة أي مسؤول عن اجرام بسوريا أو لبنان… ممنوع يكون لبنان دولة حماية لمجرمين.
رابعا: سقط نظام المجازر والارهاب وطرابلس دفعت دم وصمدت. وبتوجه رسالة محبة للجميع، ومنقول: طرابلس انحرمت من الانماء وكان ممنوع ترتيب اوضاعها، اليوم منقلهم ممنوع تبقى طرابلس مهملة ومعزولة، بدنا نطور مدينتنا وترجع مدينة الفيحاء مقصد للجميع.
خامسا: واسمحولي كون واضح، النا سنين ناطرين هالعفو العام، سقط النظام السوري وبعدنا ناطرين، لكن صبرنا انتهى، ولا بد من تحريك هالملف واقرار قانون #العفو_العام والاسراع بالمحاكمات ليطال الكل يعني الكل، وحكما الاسلاميين المظلومين. لنكون سوا بمدينة الكفاءات والعلماء والاعتدال.
بقول اعتدال لأنو #الاعتدال أقوى سلاح بوجه كل من بدو يغير هوية طرابلس الحقيقية… حنوقف بوجه ونقله تعا شوف هالناس… بدها انماء واقتصاد وازدهار وفرص عمل وحياة جديدة وامن وامان.
سادسا: طرابلس يا شباب وشابات كانت الحضن الاكبر لاشقائنا السوريين، ضيوفنا وأحبابنا، ورغم كل محاولات رميهم بتم الأسد، نحنا اختضنهم وشاركناهم لقمتنا، اليوم سوريا أصبحت آمنة وحرة وحيذكر التاريخ أنو طرابلس والشمال كان البلد التاني للاجئين الي قضيوا بعزيمتهم على مصطلح اللجوء وصاروا أمام مسؤولية اليوم بصناعة مستقبل سوريا على أرض سوريا ويعمروها من جديد.
سابعا: ما حدا يفكر يتلاعب بأمن طرابلس لأنو خط أحمر… ولما قول سقط النظام يعني انتهى زمن المحاور وانتهت الطوابير الخامسة، وأي طرف بدو يهدد الأمن حنرد عليه بحماية طرابلس عبر الأجهزة الأمنية والجيش.
واخيرا: من حقنا نحتفل ونرفع الصوت وما حدا بيمنعنا، لأننا أبناء مدينة ديموقراطية، أبناء طرابلس الدولة، طرابلس الحضن لكل اللبنانيين. ومافي خلاص لطرابلس إلا بالاعتدال وبالدولة الدولة الدولة. أهلي بطرابلس خلوا صوتكم عالي ورفعوا شعار الدولة والاعتدال… لأنكم الأصل وحتبقوا… ويعطيكم العافية”.
